.
.
.

تاجیکستان 20 هزار نیرو در مرز با افغانستان مستقر می‌کند

درگیری‌‌ طالبان و سربازان افغان در شمال و شمال‌شرق افغانستان افزایش یافته است

منتشر شده در: آخرین به روزرسانی:

پس از افزایش درگیری‌ها میان طالبان و سربازان افغان در شمال و شمال‌شرق افغانستان، امام‌علی رحمان رئیس‌‌جمهوری تاجیکستان، دستور داد تا 20 هزار نیرو در نقاط مرزی با افغانستان مستقر شوند.

رجبلی رحمان علی، فرمانده نیروهای مرزی و رمضان رحیم‌زاده وزیر داخله‌ تاجیکستان، در جلسه‌ شورای امنیت ملی کشور به ریاست امام‌علی رحمان که دوشنبه 5 ژوئیه (14 سرطان) برگزار شد درباره‌ وضعیت در مرز این کشور با افغانستان گزارش داده‌اند.

امام‌علی رحمان، در این جلسه در مورد تقویت حفاظت از مرز و اعزام نیروهای اضافی به مناطق ضروری در مرز با افغانستان تصمیم گرفت.

این تصمیم رئیس‌جمهوری تاجیکستان پس از آن است که اخیرا گروه طالبان در شماری از ولایات شمالی و شمال‌شرقی افغانستان پیش‌روی داشته‌‌اند.

منابع محلی در بدخشان که هم‌مرز با تاجیکستان است اعلام کردند که در دو روز گذشته، نزدیک به 10 ولسوالی این ولایت به دست طالبان سقوط کرده است.

1037 سرباز افغان به تاجیکستان عقب‌نشینی کردند

در پی حمله طالبان در ولایت بدخشان یک هزار و 37 سرباز امنیتی افغانستان به تاجیکستان عقب‌نشینی کردند.

خبرگزاری دولتی تاجیکستان «خاور»، دوشنبه 5 ژوئیه (14 سرطان) گزارش داد که به دنبال حمله‌ طالبان به ولسوالی‌های خواهان، شکی، نسی، ماه‌می، شغنان و اشکاشم ولایت بدخشان، یک هزار و 37 سرباز امنیتی افغانستان، با عبور از مرز به داخل خاک تاجیکستان عقب‌نشینی کردند.

ولایت بدخشان و کندز افغانستان، با تاجیکستان مرز مشترک دارد و پیش از این نیز، در نتیجه‌ درگیری‌ها در ولایت کندز، 134 نفر از نیروهای امنیتی افغان، از طریق شیرخان‌بندر، وارد خاک تاجیکستان شده بودند.

پیش از این نیز، وزارت دفاع تاجیکستان، 29 ژوئن (8 سرطان) به دنبال شدت یافتن درگیری‌ها در شمال افغانستان، اعلام کرد که نیروهای ارتش این کشور در مرز با شمال افغانستان به حالت آماده‌باش درآمده‌اند.