جنگ در بدخشان؛ 1037 سرباز افغانستان به تاجیکستان عقب‌نشینی کردند

در پی حمله طالبان در ولایت بدخشان یک هزار و 37 سرباز امنیتی افغانستان به تاجیکستان عقب‌نشینی کردند.

خبرگزاری دولتی تاجیکستان «خاور» روز دوشنبه 5 ژوئیه (14 سرطان) گزارش داد که به دنبال حمله‌ طالبان به ولسوالی‌های خواهان، شکی، نسی، ماه‌می، شغنان و اشکاشم ولایت بدخشان، یک هزار و 37 سرباز امنیتی افغانستان، با عبور از مرز به داخل خاک تاجیکستان عقب‌نشینی کردند.

ولایت بدخشان و کندز افغانستان، با تاجیکستان مرز مشترک دارد و پیش از این نیز، در نتیجه‌ درگیری‌ها در ولایت کندز، 134 نفر از نیروهای امنیتی افغان، از طریق شیرخان‌بندر، وارد خاک تاجیکستان شده بودند.

منابع محلی در بدخشان اعلام کردند که در دو روز گذشته، نزدیک به 10 ولسوالی این ولایت به دست طالبان سقوط کرده است.
قبل از این نیز و به دنبال درگیری‌ها در ولایت بلخ گفته شد که 17 سرباز امنیتی پس از درگیری با جنگ‌جویان طالب، به خاک تاجیکستان پناه برده‌اند، پس از آن اما محمد فرهاد عظیمی، والی بلخ، این موضوع را رد کرد.

والی بلخ گفت، گزارش‌های نشر شده مبنی بر فرار 17 نیروی امنیتی از ولسوالی «کلدار» این ولایت به تاجیکستان واقعیت ندارد.
والی بلخ در یک نشست خبری گفت، نیروهایی که در ولسوالی «کلدار» مستقر بودند پس از شدت جنگ در روز اول به حیرتان رفته و دوباره برگشته و در این ولسوالی مستقر شده‌اند.

آماده‌باش ارتش تاجیکستان

به دنبال اشدت یافتن درگیری‌ها در شمال افغانستان، وزارت دفاع تاجیکستان 29 ژوئن (8 سرطان) اعلام کرد نیروهای ارتش این کشور در مرز با شمال افغانستان به حالت آماده‌باش درآمده‌اند.

به گزارش خبرگزاری دولتی تاجیکستان «خاور»، فریدون محمدعلی‌زاده سخنگوی وزارت دفاع تاجیکستان گفت، به دنبال تشدید درگیری‌ها و در پی وخامت اوضاع در افغانستان، نیروهای مسلح و مرزبانی تاجیکستان از مرزهای این کشور محافظت می‌کنند.

از سوی دیگر، منیر فرهاد سخنگوی والی بلخ، روز گذشته 4 ژوئیه (13 سرطان) اعلام کرد که ایران، پاکستان و ترکیه کنسولگری‌های خود را در این ولایت بسته‌اند و کنسولگری‌های ازبکستان، تاجیکستان، ترکمنستان روسیه و هند نیز فعالیت‌های خود را محدود کرده‌اند.